Félagið Heyrnarhjálp hefur um áraraðir barist fyrir viðurkenningu á rittúlkun til jafns á við táknmálstúlkun.  Málið er ekki í höfn, en verður það vonandi innan tíðar, því að með vinnu okkar í „Framkvæmdanefnd um framtíðarlausn á málefnum heyrnarskertra og heyrnarlausra“ opnast leið til beinna áhrifa á málin til framtíðar. Í tengslum við baráttu okkar fyrir sæti við nefndarborðið erum við loks að við sjá viðhorfsbreytingu og viðurkenningu í verki á aðgengismálum heyrnarskertra.

Stór sigur náðist þegar Heyrnarhjálp fékk  einnar milljón króna styrk  frá Félagsmálaráðuneytinu vegna þátttöku Íslands í Evrópuári -gegn fátækt og félagslegri einangrun. Verkefni okkar miðar við að vinna á móti mismunun, en þar til nú hefur heyrnarskertum ekki boðist rittúlkun eða önnur hjálpartæki við hæfi til að nýta sér við félagslegar athafnir. Verkefnið er byggt upp þannig að almenn námskeið og valdir fundir verða gerðir heyrnarskertum aðgengilegir. Auk þess verður mögulegt að sækja um styrki til að lækka námskeiðskostnað. Styrkveiting v/Evrópuárs miðar  við verkefni á árinu 2010 og því höfum við aðeins hálft ár til stefnu.

Umsóknir um námskeið og styrki verða að fara í gegnum Heyrnarhjálp og er áhugasömum bent á að hafa samband við Málfríði,  mg@heyrnarhjalp.is, sem gefur frekari upplýsingar (reynt verður að svara pósti í sumarlokun sem er til 3. ágúst).  Í Fréttabréfi í ágúst verður verkefnið kynnt  nánar. Fólki er bent á að fjármagnið er takmarkað og ekki tryggt að allir sem sækja um komist að.  Eins getum við lent í því að erfitt verði að fá rittúlk í einhver verkefni, þar sem fáir rittúlkar eru starfandi. Fólk er hvatt til að hafa samband fyrir 1. september n.k.

Við hvetjum heyrnarskerta til að hafa samband við félagið og nýta þetta frábæra tækifæri til komast á almenn námskeið með rittúlkun eða mögnunarbúnaði. Mikilvægt er að góð samvinna verði milli umsóknaraðila og félagsins til að þeir fjármunir sem við höfum nýtist vel og nái til sem flestra. Öll námskeið, verkleg og bókleg koma til greina.  Styrkþegar verða að vera félagsmenn og skuldbinda sig til góðrar mætingar.

Frábært tækifæri!

Bregðist skjótt við!!